भारत की संस्कृति के लिए... भाषा की उन्नति के लिए... साहित्य के प्रसार के लिए
सरकारे देलकै जोगबारी ठामे ठाम / अमरेन्द्र
Kavita Kosh से
सरकारे देलकै जोगबारी ठामे ठाम
तहियो चोरी आरो जुआरी ठामे ठाम
उड़ोॅ कबूतर जाल केॅ लेने एक्के साथ
सेथरोॅ नुकलोॅ दिखौं शिकारी ठामे ठाम
घरबैया केॅ गोड़ बढ़ैबोॅ मुश्किल छै
बसलै सबटा जाय बहारो ठामे ठाम
मछुवारा छै ताक लगैने बोचोॅ पर
उपटै छै घनघोर बुआरी ठामे ठाम
माथा पर लाखो रोॅ करजा लेने सब
मिललोॅ हमरा यहाँ हजारी ठामे ठाम
फुलधरिया-परवैतिन एक्को पैलो नै
भोगोॅ के हकदार पुजारी ठामे ठाम
जैभौ केना रपट लिखाबेॅ थाना तक
अपराधी छै पैर पसारी ठामे ठाम
अमरेन्दर रं शायर केॅ झोपड़ियो नै
की करमोॅ के महल-अटारी ठामे ठाम
-25.3.92
