भारत की संस्कृति के लिए... भाषा की उन्नति के लिए... साहित्य के प्रसार के लिए
साँझमा समुद्र / रमेश क्षितिज
Kavita Kosh से
दिनभरि हिँडेको थकित सूर्य
साझपख ढल्केको छ टाउकोमात्रै निकालेर
पानीको बाथटबमा
रङ्गिएको छ समुद्रको पानी उसले पखालेको रातो रङ्गले
जहाजको माथिल्लो भागमा बसेर
आँखाले पिउँदैछन् कोही समुद्रको मादक सौन्दर्य
उठिरहेछन्– छिनछिनमा लहरहरू समुद्रको किनारमा
र हृदयमा उसैगरी
किनारको बालुवामा पल्टेका छन् शान्त मुद्रामा मानिसहरू
र हेरिरहेछन्
आकाशको ऐनामा समुद्रको गम्भीर अनुहार
एकछेउमा गुन्गुन्–गुन्गुन् कुरा गर्दै
रोइरहेछ भोलि टाढा हुने प्रेमीहरूको एक जोडी
यी सब दृश्यहरूबाट
अनभिज्ञ एक युवती बजाइरहिछ गितारमा एक पुरानो धुन
र भुपरिवेष्ठित देशको एकजना बिदेशी कवि
मग्न भएर एकटक
हेरिरहेछ समुद्र– समुद्रमा पानीको पहाड !
