भारत की संस्कृति के लिए... भाषा की उन्नति के लिए... साहित्य के प्रसार के लिए
स्व-सृजन / सुमन पोखरेल
Kavita Kosh से
मुस्किल छ देख्न आफैँलाई
त्योभन्दा कठीन छ आफ्नो अनुहार देख्न
र त्यसभन्दा पनि ज्यादा गाह्रो छ आफ्नो स्वभाव देख्न ।
गाह्रो छैन तर आफूलाई बनाउने कोशिस गर्न ।
टुक्राटुक्रा कर्मका चोइटालाई जोड्दै
धर्साधर्सा रङ्गहरू थप्दै
आफूलाई सग्लाउने उपक्रम गरिरहन्छ मान्छे
तर
देख्न सक्दैन ऐना नहेरी आफ्नो अनुहार
प्रतिरूप नहेरी बनाउन सक्दैन आफ्नै चित्र पनि
र
आफूलाई सक्दैन बनाउन मान्छेले
आफ्ना परिवेशबाट अलग उभ्याएर आफूलाई ।
अभ्यास गरिरहन्छ निरन्तर मानिस
आफ्नै व्यक्तित्व निर्माणको, तर
सक्दैन पूर्ण गर्न जीवनभरको कोशिसले पनि ।
आफैँलाई समेत बनाउन नसक्ने मान्छे
घमण्ड गर्छ
संसारको रूप फेरेँ, भनेर ।
