એક વાર હું ને મીરાં મથુરામાં ગ્યા'તાં,
ઘૂઘરીને ઘમકારે ઘેલાં ઘેલાં થ્યાં'તાં :
એકવાર હું ને મીરાં મથુરામાં ગ્યાં'તાં,
હાથમાં લાકડીઓ હતી,
પગમાં ચાખડીઓ હતી :
મંદિરની ઓસરીમાં રાત અમે રયાં'તાં
એક વાર હું ને મીરાં મથુરામાં ગ્યાં'તાં.
કાળા કાળા કૃષ્ણ હતા,
ગોરી ગોરી ગોપીઓ,
બોરિયાળી બંડી ને
માથે કાન-ટોપીઓ :
રાસની રંગતમાં અમે કાન ગોપી થ્યાં'તા,
એક વાર હું ને મીરાં મથુરામાં ગ્યાં'તાં.
ભજનોની ધૂન હતી
હું મોહ્યો'તો ગીતમાં
મીરાં તો જોતી હતી
માધવને ભીંતમાં :
પથરા પણ મીરાંને સાદ પાડી રયાં'તાં
એક વાર હું ને મીરાં મથુરામાં ગ્યાં'તાં.