भाषा के ज्ञानी अलबेला,
कत्ते साथी कत्ते चेला।
अंग-अंगिका के चरवाहा,
के सखि सूरो? नै ‘कुशवाहा’।
कला-मंच के पंच अनोखा,
सबके लेली खिचड़ी-चोखा।
बाईस जिला अंग परदेश,
के सखि दिलवर? नै सखि ‘गुरेश’।
ऐथौं चकमक-चकमक लागै,
बोलै छमछम की-की गावै।
सब दिन सें घर-घर के गहना,
बुझल्हौ पायल? नै जी पहुना।
चटर-पटर खिस्सा गप मारै,
छलमल-छलमल खाट पसारै।
झटपट-झटपट जारोॅ चुल्हा,
की सखि समधी? नै सखि दुल्हा।
गम-गम गूड़ मिलाबोॅ आटा,
खाय-खिलाबोॅ कुछ नै घाटा।
रंग-अबीर, भांग के गोली,
की सिरपंचमी? नै सखि होली।