अंगिका / अंगिका दोहा शतक / राहुल शिवाय
अंग महाजनपद छिकै, धरम भूमि हो भाय ।
भाषा एकरोॅ अंगिका सीधे ह्रदय समाय ।1।
भाषा हमरोॅ अंगिका, हमरोॅ माय सामान ।
तन-मन-धन करतेॅ रहौं, ममता पर क़ुर्बान ।2।
धरती, भाषा, माय सेॅ, नै छै बढलोॅ कोय ।
पूजै ‘राहुल’ जें सदा, से ही हरि के होय ।3।
निज भाषा के साथ मेॅ, अपनापन जे होय ।
‘राहुल’ करतै की भला, एकरोॅ परतल कोय ।4।
भहरतेन्दु के बात केॅ, राखोॅ ‘राहुल’ याद ।
अपनोॅ भाषा में करोॅ, लोगोॅ सेॅ संवाद ।5।
बुझतै सबनेॅ बात केॅ, जैतै मोॅन समाय ।
निज बोली मेॅ बोलभौ जों तों बात ‘शिवाय’ ।6।
अंग वेद के काल सेॅ, महाजनपद हो भाय ।
आदि अंग के अंगिका, भाषा मधुर ‘शिवाय’ ।7।
संस्कार के गीत छै, लोकगीत छै भाय ।
झूमर-कजरी ठो करै, गद-गद मोॅन ‘शिवाय’ ।8।
बिहुला-सामा गीत हो, देवी गीत हो भाय ।
‘राहुल’ ! बाबा धाम के, गीत हिया हरसाय ।9।
सिद्धोॅ के भाषा छलै बोलै छै इतिहास ।
‘राहुल’ होतै भोर हो, करनेॅ चलोॅ प्रयास ।10।
रचनाकाल- 1 अप्रेल 2013
