भारत की संस्कृति के लिए... भाषा की उन्नति के लिए... साहित्य के प्रसार के लिए
अरे बुझागड़ ! / गणेशीलाल व्यास उस्ताद
Kavita Kosh से
सशुल्क योगदानकर्ता ३ (चर्चा | योगदान) द्वारा परिवर्तित 22:04, 16 अप्रैल 2015 का अवतरण ('{{KKGlobal}} {{KKRachna |रचनाकार=गणेशीलाल व्यास उस्ताद |संग्रह= }} {{K...' के साथ नया पृष्ठ बनाया)
अरे बुझागड़ !
थारा जंतर जोतस अणुबम
कोरी फाड़ उधेड़ बैंतणी, कम सीणौ है
जग लखग्यौ पिंडताई री परघै पौची, पींदै तीणौ है
अरे मांनखा !
इण जुग जीवण री गत वेगी
पिण क्यूं डिगमिग थारा पगल्या, मन हीणौ है
डरप मती, दो हाथ मजूरी कांमधेण, धरती धीणौ है
अरे सूरमा !
जुग झाटक री धमक सुणी जद
घर क्यूं न्हाटै, कमर खुली क्यूं, रंग खीणौ है
भिचक मती, जीवण सारू पग-पग लड़णौ मरणौ जीणौ है
अरे जवांनी !
नर नारी री नस क्यूं निंवगी
लाल रगत री गरमी निठगी, सुर झीणौ है
भूल मती, इमरत मैली सागर मथणौ है, विस पीणौ है
अरे सुगायक !
नवै मिनख रै सादै सुर में
जन मैणत री राग सुणा, जद परवीणौ है
उळझ मती, जन रै जीवण में सांचौ धन, कपड़ौ कीणौ है
अरे बुझागड़ !
थारा जंतर जोतस अणुबम
कोरी फाड़ उधेड़ बैंतणी, कम सीणौ है
जग लखग्यौ पिंडताई री परधै पोची, पींदै तीणौ है
