भारत की संस्कृति के लिए... भाषा की उन्नति के लिए... साहित्य के प्रसार के लिए
आबेॅ बीती चललै प्राण के विहान रे / गंगा प्रसाद राव
Kavita Kosh से
आबेॅ बीती चललै प्राण के विहान रे
कुम्हलैलै सुक्खोॅ के गुलदौदी फूल
पड़लोॅ छै जेकरा पर दुक्खोॅ के धूल
टुटलै सब मन के गुमान रे
सोचै छै सूना में आबेॅ देवदास
मारल्है पर लिखलोॅ छै पारो के पास
खसी गेलै प्रेम के मचान रे
कानै तेॅ सूना में देखै नै लोग
आंखीं केॅ लागलोॅ छै कपसै के रोग
हिरदय में हुनके धियान रे
हँसबोॅ हँसैवो ऊ बैठी केॅ संग
गेलै सब गेलै ऊ प्राणोॅ के रंग
जिनगी भै गेलै मशान रे
आबेॅ जों हुनकोॅ नै हमरा छै साथ
कथी लेॅ होय छै करैतोॅ रं रात
चाहै छै उठै लेॅ जान रे
पछिया बयारोॅ में पुरवा के रोग
जिनगी में भोगै की यहूँ भी भोग
भूमिका जे छेलै भेलै गान रे
