Last modified on 26 दिसम्बर 2019, at 16:50

ऊ बोल चलल / कैलाश चौधरी

पियास के मारे
सब फूलबन रो रहल हल
मौल रहल हल
मगर कुछ कह नय सकऽ हल
हम भी पढ़े गेली हल
छुट्टी होला पर आइली,
फूलबन के मौलते देख के
हमरो चेहरा सूख गेल
किताब ताखा पर रख देली
आउ ओकरा पटबे लगली
देखते-देखते ऊ बिहंसे लगल
लगइ की ऊ बोल चलल
आउ अपन धमक से
हमरा खुश कर देलक
हमर हिरदा
खुशी मे नाचे लगल ।
ओकरा से हमरा
बचपने से परेम हल
बिना देखले हमरा
रहल नञ जाहल
आज ओकरा जब पियास मिटौली
त ऊ भी चुप नञ रहल
अपन परेम के बखान
मुस्कुरा के कर देलक ।