भारत की संस्कृति के लिए... भाषा की उन्नति के लिए... साहित्य के प्रसार के लिए
कइसे हिरदे धीर धरे? / पीसी लाल यादव
Kavita Kosh से
सशुल्क योगदानकर्ता ५ (चर्चा | योगदान) द्वारा परिवर्तित 22:29, 26 अगस्त 2019 का अवतरण ('{{KKGlobal}} {{KKRachna |रचनाकार=पीसी लाल यादव |अनुवादक= |संग्रह=मै...' के साथ नया पृष्ठ बनाया)
पिरित बनगे पीरा-पहार, कइसे हिरदे धीर धरे?
संगी के सुरता-संसो में, नैना निसदिन नीर झरे।
मयारू के मन का उही जाने?
या जाने ऊपर वाले भगवान
मैं तो आसरा म बइठे हँव
बाट जोहत संझा-बिहान॥
काखर करा गोहरावंव दुख, कोन ह मोर पीर हरे?
पिरित बनगे पीरा-पहार, कइसे हिरदे धीर धरे?
मोला हवय भरोसा लहुटही,
संग जीए-मरे के करे करार।
उजियारी तो आबेच करही
कब ले घपटे रही अंधियार?
परछो लेवत हवय का बेरा? महुआ दोना खीर धरे।
पिरित बनगे पीरा-पहार, कइसे मन धीर धरे?
कुछु-काही कर ले ये दुनिया,
मया-पिरित ह इहाँ जीते हे।
फुलवारी म फूल के जिनगी
काँटा मन के बीच म बीते हे॥
उसर-पुसर पारा-परोस के, बतरस-बोली तीर परे।
पिरित बनगे पीरा-पहार के, कइसे हिरदे धीर धरे॥
