भारत की संस्कृति के लिए... भाषा की उन्नति के लिए... साहित्य के प्रसार के लिए

कद तांई / कृष्ण वृहस्पति

Kavita Kosh से
Sharda suman (चर्चा | योगदान) द्वारा परिवर्तित 09:48, 16 अक्टूबर 2013 का अवतरण

(अंतर) ← पुराना अवतरण | वर्तमान अवतरण (अंतर) | नया अवतरण → (अंतर)
यहाँ जाएँ: भ्रमण, खोज

म्हे,
हां म्हे ही देवांला
म्हारी तिस नै कुवा
अर म्हारी भूख नै बाजरी।

म्हारै पांती री राड़
म्हे ई लड़ाला
अर म्है बांधाला
म्हारै घावां उपर ग्याबणा फोआ।

म्हानै ई काटणा है,
म्हारा बायोड़ो
अर म्हानै ई बांवणी है
म्हारी पगथल्यां खातर पाछी सूळां।

म्हानै ई पीवणो है
म्हारै पांती रो मेह
अर म्है ई ओढ़णो है
म्हारै सिरां उपर तण्योड़ो तावड़ो।

म्हारी पीड़ री कवितावां
म्हे ई लिखांला
म्हे ई दिखांला
म्हारै ओदर मांय बळती
इण आग रै आगूंच
अर म्हे ई बुझावाला
बेमाता रा मांड्योड़ा आंक।
आखिर कद तांई
जोवांला बीं री बाट
जिण रै होवण रो नीं है
एक बी सबूत।