Last modified on 6 सितम्बर 2016, at 03:19

को जी होलो औंणू? / केशव ध्यानी

‘घुगति-बसूती’ घूरी घुगति डालि म,
उज्यालि मयलि घूरी घुगती डालि म
रीटि-फीरि आई ऋतु,
धड़म बाजी लाठी।
फूलु की फूल्यालि आई,
गिंवड् यूँ की बाटी॥ घुगति बसूती.
डाँडी हैरि डालि मौलि,
रंग-मती बँसूला।
धरती क कंठ आज,
फूलु की हंसुली॥ घुगति बसूती.
पंथ्या धौलू[1] फ्योंलि[2], आरु
लय्या[3] फूशे बुरांस[4]
घुंगटंयालि ठुमकदी आई,
झपन्यालों, हिलाँस॥ घुगति बसूती.
पैत्वल्यों पराज-आज,
कंठ की बडुली।
आज को जी होलु औंणू?
डुलदी च लटुली॥ घुगति बसूती.

शब्दार्थ
  1. पर्वतीय फूल
  2. पर्वतीय फूल
  3. पर्वतीय फूल
  4. पर्वतीय फूल