भारत की संस्कृति के लिए... भाषा की उन्नति के लिए... साहित्य के प्रसार के लिए

गुलाब / सत्यमोहन जोशी

Kavita Kosh से
यहाँ जाएँ: भ्रमण, खोज


तीखा काँढा सब छ यसका,
           ‍चिर्न हर्दम् तयार ।
हावा चल्दा सिर सिर गरी,
           पातको हुन्छ मार ।।
हाँगा नाच्छन् फर फर चली,
           कोपिला फेरि हाँस्छन् ।
बन्दै साथी, चपल भमरा,
           फूलमा चट्ट बस्छन् ।।१।।

हाँसी हाँसी सररर गरी,
           फूल रोएर झर्छन् ।
बास्ना मीठा अलिकति दिंदै,
           कालका गाँस बन्छन् ।।
फुल्छन्, झर्छन् सहज यसरी,
           फूल मीठो र राम्रो
सारै छोटो तर बुझ यहाँ,
           आयु यस्तै छ हाम्रो ।।२।।


(नोट- पं. बदरीनाथद्वारा सम्पादित पुस्तक पद्यसङ्ग्रह बाट भाषाका तत्कालिन मान्यतालाई यथावत राखी जस्ताको तस्तै टङ्कण गरी सारिएको)