सृष्टिभरिको निस्सारतामा दौडिरहेको शहरको शून्यतालाई बोकेर
जब म आफ्नो घरभित्र पस्छु
त्यस घरभित्र थुप्रै घरहरूले मलाई पर्खिरहेका हुन्छन् ।
चराहरूलाई पछ्याउँदै मैले सिक्न खोजेको सृष्टिको वाणी
ऐना र अनुहारहरूमा मैले भेट्न खोजेका दृष्य र रङ्गहरू
भीडमा हराएर मैले खोजिरहेको हृदयको सङ्गीत
मनका पत्रपत्रले खोजिरहेको प्रेमको स्पर्श
र आफू हुनुको प्रमाण बोकेका जीवनका सुवासहरू
मेरो बाटो हेरिरहेका हुन्छन् ।
दुनियाँले उधारेर सिध्याएको आफूलाई लिएर
जब म आफ्नो घरभित्र पस्छु
विलुप्त हुनै लागेको जीवनलाई आकार दिन
घरभित्र थुप्रै घरहरूले मलाई पर्खिरहेका हुन्छन् ।