चैती रार / मुनेश्वर ‘शमन’

अँखियन में बसल खुमार।
पिया अभियो नञ अइलन।
चेता मचावय सखि रार।
पिया अभियो नञ अइलन।

सुने अँगनमा में चाननी गोरी।
घर-पिछूअड़वो निबुआ निगोड़ी।
मारय नित ताना हजार।
पिया अभियो नञ अइलन।

बउरल बगिये नियर बउरल देहिया।
गदरल जुआनी पर सोभय बिंदिया।
पायलिया करऽ हइ पुकार।
पिया अभियो नञ अइलन।

आसा-अधूरा सपनमा हल साजल।
रह गेलय मोरा मनवाँ पियासल।
माँगय ई अब रसधार।
पिया अभियो नञ अइलन।