भारत की संस्कृति के लिए... भाषा की उन्नति के लिए... साहित्य के प्रसार के लिए
जहिया तोहार आँखि के पानी उतर गइल / मिथिलेश गहमरी
Kavita Kosh से
जहिया तोहार आँखि के पानी उतर गइल
बुझिहs, कि जिन्दगी के रोहानी उतर गइल
मुस्कान, आस, लोर, लचारी, बिरह-ब्यथा
कागज प जिन्दगी के कहानी उतर गइल
कइसे कसाई पूत हो जाला, ई सोंच के
माई के बूढ़ आँखि में पानी उतर गइल
बेटा के माथे, धूर-अखाड़ा के देखि के
नस-नस में बाबूजी के, जवानी उतर गइल
छन भर गजल के छाँह में बइठल रहीं, हुजूर
सउँसे उमिर के दाह-थकानी उतर गइल
मनबढ़ बहुत रहे, तबो मउवत के सामने
मिथिलेश, जिन्दगी के फुटानी उतर गइल
