तूं कद आसी
अलूणी बाहां सूं बंध्योड़ा
थारी गाढी प्रीत रा
रंगीला सपनां नै
ओळू आवण लागी
सावण सा मीठा होठां पर
थारी हेत री लगायोड़ी लाली री
रंग उतरबा लाग्यो
तूं कद आसी
गोखा रै सारै
थारा हाथ सूं लगायोड़ी
सुरजमुखी रै फूल आग्या
बाट जोवतां-जोवतां
म्हारो मन
सूखी फळी सो तिड़कण लाग्यो
तूं कद आसी
थारै बिना आ देह
बंजड़ धरती सी लागै
थारै बिना आ उमर
करज लियोड़ै धन सी लागै
थारै बिना अै गीत
जेठ री बळती लूवां सा लगै
तूं कद आसी
रोज थारै प्रीत रै देवरै माथै
रूप री प्याली
चोढ़तां-चोढ़ता
म्हारी देह सूखगी
हेत रै चूरमै री पिंडी
पड़ी-पड़ी सूखण लागी
तूं कद आसी
थारी छाती री धड़कणां सूं
जीवती रहबाळी
कांचळी रा सांसा रा तार
उघड़बा लाग्या
खूंटी रै टंग्यौडै पोमचै पर
लाग्योडो मूंधो गोटो
झूठो पड़बा लाग्यो
तूं कद आसी
आज कोठै पर
मोर अर मोरनी
छतरी ताण्यां खड्या है
म्है थारै सपनां रै
पड़वै में ऊभी-ऊभी
कलपनां रा केस
सुळ्झा री हूं
तूं कद आसी