Last modified on 1 अक्टूबर 2016, at 22:40

तूं ज़रूर अचिजंइ / रश्मी रामाणी

जॾहिं
मां कुझु बि चवणु न चाहियां
तूं हली अचिजइं डिघी सांति बणिजी।

सहण खां ॿाहिर थी वञे जॾहिं अकेलाई
कंहिं गहरे दोस्त वांगुरु
तूं मूंसां गडु रहिजइं।

घाटी ऊंदहि में
जॾहिं गुल थी वञे मुंहिंजो वजूद
तूं ज़रूर ॿरजइं मेणबतीअ जियां।

सॼो शहरु जॾहिं भरिजी वञे
दहशत ऐं कोलाहल सां
जल्दु हलियो अचिजइं तूं
अमन ऐं शान्ती बणिजी।

उदास ॿनियुनि में
मुरझाइण लॻे जॾहिं फ़सुलु
गरमीअ जे मींहं जो वसकारो बणिजी
तूं ज़रूर अचिजइं ऐं महसूस कजइं त
छा थीन्दी आहे अन जी ख़ुशबू

ऐं मिटीअ जी महक।
हाराइजी वञां अगर मां भु कुझु
तॾहिं बि तूं हलियो अचिजइं
ज़िन्दगीअ ते मुंहिंजो विश्वासु बणिजी।
वक़्त जो वाचूड़ो शायद
मेरांझिड़ो करे विझन्दो मुंहिंजे
मन जो आईनो
ख़ारो ई सही
अखियुनि मां ज़रूर वहिजइं तूं
भली त लुड़िक बणिजी।
उदास बेचैनीअ जी तपति
रेगिस्तान बणाए छॾीन्दी ज़िन्दगीअ खे, पर
तूं जल्दी ई लभिजी वञिजइं मूंखे
वारीअ में लिकलु पाणी बणिजी।
पथरु न बणिजी वञे मुंहिंजो वजूद
उन खां पहिरीं तूं ज़रूर ॾिजइं मूंखे पंहिंजो छुहाउ
शायद
मन पैदा थी सघे का सरसराहट।

तेज़ रफ़्तार दरयाहु बणिजी
वहाए वञिजइं मुंहिंजे
अन्दर-ॿाहिर जी गंदगी
निर्मल थियण खां पोइ ई त
महसूस थीन्दो आहे

पवित्रता जो अहसासु।
ॾिसु! तूं कॾहिं बि अचणु चाहीं
ज़रूर अचिजइं, घड़ी पल लाइ ई सही
तुंहिंजे अचण सां
हलियो ईन्दो इनसानी ज़िन्दगीअ में घणो कुझु।