भारत की संस्कृति के लिए... भाषा की उन्नति के लिए... साहित्य के प्रसार के लिए
दीठ-दोस / चंद्रप्रकाश देवल
Kavita Kosh से
वांरै मनां आंमनौ है
के कोरामोरा कुदरत रा चितरांम कोरूं
अेक लेंडस्केप बणावणियौ म्हैं
लोगां रै दुख-दरद नै कांईं जांणूं
वै देखै कोनीं
म्हारै केनवास मांय हरमेस
अेक रंग उडीकै दूजा रंग नै
अेक खाली ठौड़ उडीकै आपरौ पसार
अरथ जलमावता वै दीसै साफ-साफ
अर वै सबदां रा साबला नीं व्है
अेक उडीक नै
सागीड़़ौ अरथ सूंपता
वै है
मिनखां रा संसार में
सबद जूंण सूं बारै
साफ-साफ वकारता
के देखौ-है बादळ रै मन
रूंख रै इंछा
औ मन
आ इंछा
आंरै सुख-दुख सूं भर्योड़ा व्है
छिलौछिल
