|रचनाकार='मनुज' देपावत
|संग्रह=
}}[[Category:मूल राजस्थानी भाषा]]{{KKAnthologyDeshBkthi}}{{KKCatRajasthaniRachna}}
{{KKCatKavita}}
<Poem>
तूं कोट बणावै उण जूनोड़ै, जुग री बोदी बातां रा
रे बीत गयो सो गयो बीत, तूं उणरी कू़डी आस त्याग ।
छाती पर पैणा....पड़्या नाग रे ,धोरां आल़ा देश जाग रे ! ऊंटा आल़ा देश जाग !
खागां रै लाग्यो आज काट, खूंटी पर टंगिया धनुष-तीर
ईं नफाखोर अन्याय नै, करद्यो कोडी रो तीन-तीन
फण किचर काळियै सापां रो, आज मिटा दे जहर-झाग ।
छाती पर पैणा...पड़्या नाग रे ,धोरां आल़ा देश जाग रे ! ऊंटा आल़ा देश जाग !.
रे देख मिनख मुरझाय रह्यो, मरणै सूं मुसकल है जीणो
रे जाग खेत रा रखवाळा, आ बाड़ खेत नै खावै है
ऐ जका उजाड़ै झूंपड़ल्यां, उण महलां रै लगा आग ।
छाती पर पैणा...पड़्या नाग रे ,धोरां आल़ा देश जाग रे ! ऊंटा आल़ा देश जाग !
ऐ इन्कलाब रा अंगारा, सिलगावै दिल री दुखी हाय
ऐ सदां पत्थरां रा सेवक, वै आज मिनख नै पूजैला
ईं सदां सुरंगै मुरधर रा, सूतोडां जाग्या आज भाग ।
छाती पर पैणा....पड़्या नाग रे ,धोरां आल़ा देश जाग रे ! ऊंटा आल़ा देश जाग !
</poem>