पांणतियौ / रेंवतदान चारण
सूंडियै रा सींचारा बळदां नै वैगा हाकजै
पावणी है कोरवांण, पूरौ चेतौ राखजै-
बारौ भरियौ आवै है!
नीर निवायौ लावै है!
बायरै रा ठंडा झोला सांम्ही छाती झेलजै
पैलौ जोटौ आवै है, पांणतिया खोडौ धेरजै!
पूंन गैली कांई जांणै, मतवाळौ हूं
हेम जैड़ा हाड म्हारा, पांणतवाळौ हूं
झगड़ै रौ कोड व्है तो हेमाळै नै मेलजै
पावणी है कोरवांण, पूरौ चेतौ राखजै!
धोरै-धोरै पांणी ढळै, बीज पीवै है
धरती नै सींचै जका लोग जीवै है-
डांफर बाजै जाड़ौ है!
आधौ डील उघाड़ौ है!
मैणत रौ अखाड़ौ है!
बायरै रा ठंडाझोला सांम्ही छाती झेलजै!
पैलौ जोटौ आवै है, पांणतिया खोडौ घेरजै!
हेम जैड़ा हाड़ म्हारा सीयाळै री रात
पाळौ जै पड़ै ते कांई जीत म्हारै हाथ
झगड़ै रौ कौड व्है तो हेमाळै नै मेलजै
पावणी है कोरवांण, पूरौ चेतौ राखजै!
धोरै-धोरै पांणी ढळै, धरती सिंचीजै है
माटी बीज मांगै, भाई मांनखौ पतीजै है
धोरै घींयौ दीनौ है!
बीजां पांणी पीनौ है!
रूप नवौ कर दीनौ है!
पाटी मुजरौ लीनौ है, कांमेती हंसनै बोलजै
पैलौ जोटौ आवै है, पांणतिया खोडौ घेरजै!
सूंडियै रा सींचारा बळदां नै बैगा हाकजै
पांवणी है कोरवांण, पूरौ चेतौ राखजै!
नीर निंवायौ बारौ आयौ, धोरा पाळी बांधजै
घणी भळांवण कांई देवूं हेलो म्हारौ सांमजै!
सांभळयौ भाई सांभळयौ, बळदां नै खाता हाकजै
पावणी है कोरवांण, पूरौ चेतौ राखजै!
बायरै रा ठंडा झोला, सांम्ही झेलजै
पैलौ जोटौ आवै है, पांणतया खोडौ घेरजै!
