भारत की संस्कृति के लिए... भाषा की उन्नति के लिए... साहित्य के प्रसार के लिए

पिया, पावस बरसै छै घनघोर / कुमार संभव

Kavita Kosh से
यहाँ जाएँ: भ्रमण, खोज

पिया, पावस बरसै छै घनघोर,
आशा में थमलोॅ हमरोॅ ई प्रीत के डोर।

दीया वारी, सेज संवारी, करि मिलन तैयारी,
की कहियौं तखनी ही घिरलै मेघ अनाड़ी,
सोचै छियै, मनें छगुनै विरह रात ई भारी
देखोॅ भींगी गेलोॅ छै, आँखी के दूनोॅ कोर,
पिया, पावस बरसै छै घनघोर।

पावस वियोग दादुर शोर मचाबै
रात अन्हरिया कुछु नै सुझावै,
कंत बिना हमरा पल-पल सताबै
दूजे कोकिन, दादुर के शोर,
पिया, पावस बरसै छै घनघोर।

पिया अबकी ही तेॅ छेलै गौना के वारी
बिना समझले तोही तेॅ देल्होॅ टारी,
गाछ-पात सगरोॅ छहरै तोरो ही छवि न्यारी
पिया पावस में तरसै छै मन मोर,
पिया, पावस बरसै छै घनघोर।