मन्दिरहरूलाई पनि भत्किरहेको देखेँ / भीम विराग

आफू रोएर अरूलाई हँसाउनेहरू देखेँ
अरूमाथि हाँस्नेमाथि हाँस्नेहरू देखेँ

सहन त सक्ने रहेछ मानिसले पीडाहरू
चोटले त ढुङ्गा पनि टुक्रिरहेको देखेँ

उज्यालो दिन्छ कालो रातलाई पनि हीरा
घाममा त ऐना पनि टल्किरहेको देखेँ

पहाडलाई पनि टेकी उठिरहने आकाश
सागरमा खसेर पनि डुबिरहेको देखेँ

समयभन्दा बलियो कोही हुँदैन रहेछ, विराग
मन्दिरहरूलाई पनि भत्किरहेको देखेँ