मुख ऐथर चिफळि गिच्ची करदन लोग
अर पीठ पैथर झूठी-सच्ची धरदन लोग |
हुणत्यळि डाळी का मौळंदा पात देखीक
झणि किलै जलड़ौंम छांछ संग्ती डलदन लोग |
दूधौ-दूध , पाण्यू-पाणि द्यिख्येंद सब्यूं
मुख सामणि मुखसौड़ा फिर्बी मरदन लोग |
सब्बि जगौं बण्यां रौंदन भौत पर्वाण
हैंका तैंकम झट्ट पक्वड़ी तलदन लोग |
जणदा नी बल मंत्र द्येखा बिच्छी को
सर्प द्वलणी हत्थ फिर्बी कुचदन लोग |
मिल्द जब हे स्याळ ददा वळो पट्टा "संदीप "
अफ्वी औतारी अफ्वी पुजारी बणदन लोग |