भारत की संस्कृति के लिए... भाषा की उन्नति के लिए... साहित्य के प्रसार के लिए

मृत्यु / विष्णुविभु घिमिरे

Kavita Kosh से
Sirjanbindu (चर्चा | योगदान) द्वारा परिवर्तित 16:27, 15 फ़रवरी 2022 का अवतरण ('{{KKGlobal}} {{KKRachna |रचनाकार=विष्णुविभु घिमिरे |अनुवादक= |संग्...' के साथ नया पृष्ठ बनाया)

(अंतर) ← पुराना अवतरण | वर्तमान अवतरण (अंतर) | नया अवतरण → (अंतर)
यहाँ जाएँ: भ्रमण, खोज


मान्छेलाई गोली ठोक्ता
मृत्यु नआए के हुन्थ्यो होला ?
निर्मम कोर्राहरूले चोट दिँदा
पीडा नचहऱ्याए के हुन्थ्यो होला ?
मृत्यु हिजोआज साहै सस्तो भएको छ
बाँच्नु कति महँगो हुँदै गइरहेको छ
मृत्युलाई हिजोआज
म चोक-चोकमा भेट्छु
म सडक-सडकमा डुलिरहेको देख्छु
कुन्नि मेरा आँखामा सर्वत्र मृत्य् मात्र देख्छु
जब-जब एउटा जिउँदो राष्ट्र खोज्छु
म मात्र लाशै-लाशको विश्व भेट्छु
 
अब जीवन शहरबाट विरक्तिएर भाग्न लागेको छ
अब जीवन बस्तीबाट उजाड भएर हिँड्न लागेको छ
जीवन अफगानीस्थानबाट
जीवन कम्पोचियाबाट
जीवन इरानबाट
जीवन...
जीवन.....
जीवन आफै उभिएको धर्तीबाट
मृत्युको कुन्नि कुन नयाँ देशतिर
बसाइँ सरिरहेछ
मैले मृत्युलाई महान् भनेको थिएँ
सृष्टिको विवेचक ठानेको थिएँ
ऊ आफै हो
ऊभन्दा स्वतन्त्र न कोही छानेको थिएँ
तर नीच रहेछ मृत्यु-मर्नेहरूभन्दा
कति सस्तो रहेछ मृत्यु
स्वयं मृत्युको नीचताभन्दा
नत्र मान्छेलाई गोली ठोक्ता
ऊ नआए के हुन्थ्यो ?
नत्र मान्छेलाई झुन्ड्याउँदा
ऊ अन्तै हराए के हुन्थ्यो ?

दास रहेछ मृत्यु पनि
तर मृत्युले केही जित्तैन
गोली खानेहरूका अगाडि
रगत बगाउनेहरूका अगाडि
मृत्युले कहिल्यै जित्तैन
देश माग्नेहरूका अगाडि