भारत की संस्कृति के लिए... भाषा की उन्नति के लिए... साहित्य के प्रसार के लिए

रतिया क देखलीं सपनवाँ अंगनवाँ / हरिवंश पाठक 'गुमनाम'

Kavita Kosh से
Lalit Kumar (चर्चा | योगदान) द्वारा परिवर्तित 09:23, 7 सितम्बर 2013 का अवतरण ('{{KKGlobal}} {{KKRachna |रचनाकार=हरिवंश पाठक 'गुमनाम' |अनुवादक= |संग...' के साथ नया पन्ना बनाया)

(अंतर) ← पुराना अवतरण | वर्तमान अवतरण (अंतर) | नया अवतरण → (अंतर)
यहाँ जाएँ: भ्रमण, खोज

रतिया क देखलीं सपनवाँ अंगनवाँ
टह-टह लाल कचनार,
नेहिया क बिरवा क लामी-लामी पतिया
पतिया से भेजे अँकवार
मुँहवाँ क पनियाँ में मनवाँ धोराइल
आगि क लवरि अँगिराय,
अथरा क तरवाँ न चनवाँ ढँपाला
रूपवा न घुँघटा अमाय।
थहरत अंग-अंग सँचवा क ढारल
लरजल मन सुकवार।। टह-टह...
दरकलि अँगिया दरजिया पठौतीं
हियरा पठाईं कवन ठाँव,
तोरि-तोरि सपना मिलाइ देत मटिया
भइलि बदनाँव
उचटलि निनियाँ मनवले ना माने
आँखि-आँखि होत भिनुसार।। टह-टह...
जिनिगी क रतिया, सनेहिया क निनियाँ
मटिया क सपना जवान,
का देइ मनवाँ क बबुआ मनाईं,
खेले के माँगेला चान।
काँची उमिरिया छोहाइल छतिया
अँखियन ढुरुके दुलार।। टह-टह...
मटिया क गगरी पिरितिया क उझुकुन
जोगवत जिनिगी ओराय,
सगरी उमिरिया दरदिया क बखरा
छतिया क अगिया घुँआय।
बूड़ि जात कजरा में अँचरा क कोरवा
लोरवा लिखल बा लिलार।। टह-टह...