जागौ भइय्या होइस बिहान
बासदेव ला दे दव दान। जै गंगान
एक पुरोहित रहय गरीब,
जेकर रहय सुदामा नाम।
भीख मांग के गुजर चलाय,
अऊ लेवय ईश्वर के नाम। जै.
कई साल ले परिस दुकाल,
जनता होगे हाल बेहाल।
भूख मरिन जब खुद जजिमान
कोन सुदामा के पूछय हाल। जै.
एक दिन लांघन एक उपास
ओ बपुरा हा गुजर चलाय।
एके लुगरा ल बमनिन दाइ
आधा काचय, आधा सुखाय। जै.
बेच डारिन सब खेत किसान,
गहना गुरिया सबो बोहाय।
उपरोहित बपुरा हा भाइ
काला लेके बेचे ल जाय। जै.
खिचरी रांधे के हड़िया एक,
लोटा तेमा मांगे ल जाय।
कोपरी तेंमा खिचरी खाय
अऊ अतके मां गुजर चलाय। जै.
कथरी घलो गेइस चिराय,
पूस के रात हा नई पहाय।
बामन, बमनिन करिन विचार
कईसे करके गुजर चलाय। जै.
विपत काल मां धरम बचाय,
जे लेवय ईश्वर के नाम।
कहय सुदामा सुन ले बाम
तेकर होथे पूरा काम। जै.
उपरोहतिन ह तब खिसियाय,
सुलने बामन मोर हवाल।
बिना अन्न के तरसै प्राण
भूखे भजन न होय गोपाल। जै.
तईहा तईहा के तै बात,
ओ दिन मोर करा गोठियाय।
एक झन राहय तोर मितान,
तोरे संग ओ पढ़े ले जाय। जै.
तुहला ओहा कहय मितान
दुख पाबे तब करबे ख्याल।
मैं हा राजा बनते साठ
तोला करहूं माला माल। जै.
बनके ओहा राजा आज
पुरी द्वारिका में राज चलाय।
तेहा जाके ओकर पास
हमर गरीबी ल देव बताय। जै.
ओकर जस ला गजब सुनाय,
तैंहा कइ थस दीन दयाल।
जाके ओकर डेहरी आज,
देखतो कतका करथे ख्याल। जै.
कहै सुदामा अरे अबूझ
तोला काही नई ए ज्ञान।
अपन करम के फल ला आज
हमन पावत हन तै जान। जै.
नान नान मां बदेन मितान
को जानी का होही ख्याल।
ओ राजा मैं एक गरीब,
घर ले कहूं देइस निकाल। जै.
अड़बड़ दिन मां होही भेंट,
कइसे जाहू दुच्छा हाथ।
बमनिन गेइस परोसिन पास,
लेके आइस चाऊर साथ। जै.
लम्बोदर के लेके नांव,
ाऊर गठरी लेइस उठाय।
चलिस सुदामा मांगत खात,
पुरी द्वारिका पहुंचय जाय। जै.
सुंदर बाग बगइचा देख,
बामन अपन दुख बिसराय।
बड़का बड़का महल छवाय,
द्वार द्वार में चउक पुराय। जै.
सुघ्घर-सुघ्घर माई लोग,
पूजा करे ले मंदिर जाय।
गली गली मां बाल गोपाल
खेलय अऊ अड़बड़ चिल्लाय। जै.
एक बरोबर सब घर द्वार,
कामां होही मोर मितान।
देख सुदामा अचरज होय,
धन हे तोर माया भगवान। जै.
पूछत राज महल मां जाय,
देखय ठाढ़े चौकी दार।
कहय कि राजा ल देव बताय,
तोर मितान हा आए द्वार। जै.
द्वारपाल हा कइथे जाय,
नाथ, आय हे एक महराज।
चिरहा धोती मं छत्तीस गांठ
हाथ मं गठरी धरे बिराज। जै.
निचट गरीबहा दुब्बर देह,
गजबे दुरिहा ल रेंगत आय।
कइथे तुहला अपन मितान,
अपन सुदामा नांव बताय। जै.
सुनके प्रभू सुदामा नांव
दरवाजा मा दउरत आय।
बचपन के सगी ला आय
देखके ओकर जिय हरसाय। जै.
छात मां ले करथे भेंट,
होथे ओकर गदगद प्राण।
मन मां बामन गूनय भाइ
धन हे तोर माया भगवान। जै.
धन मां अंधरा होथे लोग,
नई करय ओ ककरो सोर।
तैं हा राजा बनके आज,
चिन्हारी ला करेच मोर। जै.
राजमहल मां गेइन फेर,
राजा रानी धोइन पांव।
देखके ओकर फूटे बवाइ
अऊ कांटा टूटे के घाव। जै.
राजा रोवय गला लगाय
दुख पाए तै गजब मितान।
मेवा, लाडू, दूध मलाई
रानी हा लाइस पकवान। जै.
देख मितानी के बेवहार,
मन मां बामन गजब लजाय।
चाउर के गठरी ला टार,
अपन पाछू डहर लुकाय। जै.
कृष्ण चंद्र हा जानिस भेद,
लेइस गठरी अऊ मुसकाय।
मूंठा मां ले चाऊर खाय,
बोले चाऊर गजब मिठाय। जै.
गजब सुदामा के होइस मान,
महिना दिन हा गइस पहाय।
जाए के अब होइस ध्यान,
अऊ बमनिन के सुरता आय। जै.
मन मां, बामन करथ संकोच,
कइसे मांगव मय भगवान।
जानत हे मोर सब्बो हाल,
अपने मन में दिही मितान। जै.
राजा रानी दुन्नो कोय,
बिदा के बेरा अब्बड़ रोय।
देकर मोला खबर मितान
जब-जब तोला विपदा होय। जै.
मन मां बामन गूनय भाय,
कइसे हावय मोर मितान।
दुच्छा करय विदाई मोर,
कइसे ए मोर करही ध्यान। जै.
ओती ओहा गूनत जाय,
देखही मोला बमनिन आय।
कइही वामन तोर मितान,
धन ला पाके गय बौराय। जै.
सच मां दुनिया हां भगवान,
धन ला पाके चक्कर खाय।
ब्रम्हा जेकर लिख दिस भाल,
कतको मेटे नई मेटाय। जै.
अपन गांव के तरिया पार,
लीम तरी बामन सुरताय।
देख महल ओहा चकराय,
पुरी द्वारिका के सुरता आय। जै.
खदर के कुरिया मोरे धाम,
दीखत नइए मोला राम।
कोन मेर होही बमनीन मोर,
जीयह हे ते होगे काम। जै.
पुतरी, करघर, टोड़ा, ठार
मटकत बमनिन तरिया आय।
ओहा चेरिया मन के संग,
डुबक डुबक के खूब नहाय। जै.
देखिस तरिया पार मां कोन,
चिन्हिस ए तो बामन मोर।
दुरिहा ले बमनिन चिल्लाय,
विपदा टरगे बामन तोर। जै.
बामन गूनय हे भगवान
तोर माया के अपरम पार।
राजा मोला बनाके आज
लालच में मत मोला डार। जै.
दू मूठा मैं अन्न ला पांव,
निशिदिन तोरे गुन ला गांव।
बनके राजा हे भगवान
धरम करम ला झन बिसरांव। जै.
बमनिन ओती मजा उड़ाय,
बामन ऐती चक्कर खाय।
तीनों लोक मा जेकर राज,
कोन उंहा ले खाली आय। जै.
वासुदेव के सुन ले गान,
धरमिन दाई दे दे दान।
जग मां बाढ़य प्रेम तुम्हार
सब्बो अइसने पाव मितान। जै.