भारत की संस्कृति के लिए... भाषा की उन्नति के लिए... साहित्य के प्रसार के लिए
स्वामिनी! सेवा को सुख पाऊँ / स्वामी सनातनदेव
Kavita Kosh से
श्रीजूके प्रति
राग अडाणा, तीन ताल 3.9.1974
स्वामिनी! सेवा को सुख पाऊँ
चहों न रिधि-सिधि हूँ कछु राधे! जो तुव रति-रस माहि समाऊँ॥
सुरग और अपवरग न भावै, निसि-दिन तुव मधु-मूरति ध्याऊँ।
तुव पद-रति ही नित-निधि मेरो, ताहि पाय अब कित चित लाऊँ॥1॥
परी रहों नित कुंज-पौरि पै, जुगल-केलि-क्रीडा नित ध्याऊँ।
प्रीति-प्रसादी मिलै प्रियाजू! तो अपनो बड़भाग्य मनाऊँ॥2॥
चरन-चाकरी को उछाह उर नयन-नीर पद-जुगल-न्हवाऊँ।
अति रुचिसों रचि-रचि पद-जावक पायँ पलोटि पुलकि हरसाऊँ॥3।
मेरी जीवन-धन तुम राधे! तव रति रस में मतिहिं बसाऊँ।
पद-रति ही की जोति जगा उर, तासों हिय को तिमिर नसाऊँ॥4॥
कृपा-कोर जो होहि रावरी तो राधे! मैं कहा न पाऊँ।
सदा सदासों पोसी तुम ही, फिर क्यों अब ही खाली जाऊँ॥5॥
