भारत की संस्कृति के लिए... भाषा की उन्नति के लिए... साहित्य के प्रसार के लिए
मोर गांव / ध्रुव कुमार वर्मा
Kavita Kosh से
सशुल्क योगदानकर्ता ५ (चर्चा | योगदान) द्वारा परिवर्तित 18:56, 15 जून 2019 का अवतरण ('{{KKGlobal}} {{KKRachna |रचनाकार=ध्रुव कुमार वर्मा |अनुवादक= |संग्...' के साथ नया पृष्ठ बनाया)
फूल कांस के थारी असन तरिया
सतजुग के सियान पार के पीपर
खेतखार के धान भुंया के मया
गावय बन कुकरा ह जस ल जेकर।
बारी बखरी में झडड़े हे अब्बड़
खेखसी, कुंदरू, कोहड़ा अउर करेला
जइसे भाई असन मिलके रइ थे
सुखरू, सोनू मंगलूराम, भगेला।
अंगना में तुलसी के सुघ्घर चौरा
अऊरदीया के चारों मुड़ा अंजोर
अइसे लागत हाबय मूंड उघारे
हांसत हे ककरो आंखी के कोर।
धाम बिहानिया छानही ऊपर बइठे
जइसे ककरो मेंहदी रचे हथेरी
कऊवा हा को जनी का गोठियाथे
काकर गोठ ल आके घेरी-भेरी।
सूआ, पडकी, मैना असन लइका
खोर गली मां खेल खेल मटकाथे
कूंआ पार मां मोटियारी सकलाके
भरथे तेकर ले जादा छलकाथे।
ककरो मांघ के टिकली असन सुकवा
बड़े बिहनिया कुकरा अलख जगाथे।
अंगना बाहरत भौजी हाथ के चूरी
मोर भइय्या के मया ल गोठियाथे।
