"सखरा लागै सैण / मानसिंह राठौड़" के अवतरणों में अंतर

अंतस राखै ऊजळो,बोलै मीठा वैण ।
आये नों आदर घणो,सखरा लागै सैण ।।

धरा उतर में धूंधळो,खमके आभै खैंण ।
इण अवसरिये आवजो,सखरा लागै सैण ।।

मेहमा करां मोकळी,नेह बरसाय नैण ।
पल-पल प्रीत परोसतां,सखरा लागै सैण ।।

एकर आवो आंगणे,रहिजो हेकज रैण ।
बखत बातां म बीतसी,सखरा लागै सैण ।।

घूमां दिल्ली आगरो,अर घूमां उज्जेण ।
बाढाणौ व्हालौ घणौ,सखरा लागै सैण ।।

करनल माँ किरपा करै,दुरगा मेटै दैण ।
आवड़ राखै आबरू,सखरा लागै सैण ।।

अवसर आयां आवजो,नित-नित तरसे नैण ।
थां आयां उसरँग थपै,सखरा लागै सैण ।।