भारत की संस्कृति के लिए... भाषा की उन्नति के लिए... साहित्य के प्रसार के लिए
गीतावली सुन्दरकाण्ड पद 31 से 40 तक/पृष्ठ 5
Kavita Kosh से
(35)
चले लेन लषन-हनुमान हैं |
मिले मुदित बूझि कुसल परसपर-सकुचत करि सनमान हैं ||
भयो रजायसु पाउँ धारिए, बोलत कृपानिधान हैं |
दूरितें दीनबन्धु देखे, जनु देत अभय-बरदान हैं ||
सील सहस हिमभानु, तेज सतकोटि भानुहूके भानु हैं |
भगतनिको हित कोटि मातु-पितु अरिन्हको कोटि कृसानु हैं ||
जनगुन रज गिरि गनि, सकुचत निज गुन गिरि रज परमानु हैं |
बाँह-पगारु, बोलको अबिचल बेद करत गुनगान हैं ||
चारु चाप-तूनीर तामरस-करनि सुधारत बान हैं |
चरचा चलति बिभीषनकी, सोइ सुनत सुचित दै कान हैं ||
हरषत सुर, बरषत प्रसून सुभ सगुन कहत कल्यान हैं |
तुलसी ते कृतकृत्य, जे सुमिरत समय सुहावनो ध्यान हैं ||
