भारत की संस्कृति के लिए... भाषा की उन्नति के लिए... साहित्य के प्रसार के लिए
जो बरगाहीं मरेंगन / विजेता मुद्गलपुरी
Kavita Kosh से
नीक बात नै ठीक लगै छौ
जो बरगाहीं मरेंगन
अभी उमर छौ पढ़ै लिखै के
अभी उमर छौ ज्ञान सिखै के
नै कर वनचर मकतें बेटा
अभी उमर छौ लोग बनै के
बात मान त पढ़ेंगन, या-
जो बरगाहीं मरेंगन
ऊ साथी सब काम नै देतौ
जे तोरा गाँजा पिलबै छौ
ऊ सब मतलब के साथी छौ
जे सब तोरा बहकाबै छौ
बात अगर उकरू बुझबै छौ
जाय के चीलम भरेंगन
चेहरा पर त बारह बजै छौ
भैर पेट नै खाय ले मिलै छौ
रात-रात भर खों-खों करै छें
तैयो गाँजे पिऐ ले मरै छें
खोखो से नै निन्द हुऐ छौ
बैठल गिनै छें तरेंगन
घर-दुआर से मतलब नै छौ
घर में खाली खाना छौ
काम-धाम नै तास खेल के
कैसूँ दिवस बिताना छौ
काम-धाम के भाँड़ में झोंकें
तास के पत्ती घरेंगन
ओकरो तों पतीते बुझिहें
जे तोरा समझाबै छौ
सच्चा साथी ऊ सब छीकौ
जे चीलम पकराबै छौ
जब हमरा कहले में नै छें
जे मन आबौ करेंगन
नीक बात नै ठीक लगै छौ
जो बरगाहीं मरेंगन
