भारत की संस्कृति के लिए... भाषा की उन्नति के लिए... साहित्य के प्रसार के लिए
ढफ ढोल बजाकै मुनियादी होनी चाहिए / दयाचंद मायना
Kavita Kosh से
ढफ ढोल बजाकै मुनियादी होनी चाहिए
पूर्णिमा प्रकाश की शादी होनी चाहिए...टेक
यो भारत गारत कर डाला इन ऊँच-नीच के धन्घे नै
बाकायदा हक मिलना चाहिए, पशु और परिन्दे नै
हो ईब हर बन्दे नै आजादी होणी चाहिए...
ईश्वर भी बुरा मान जा सै, जुल्म के करे तै
छुआछूत भेद ना चाहिए आदमी खरे तै
हो ईब नए सिरे तै आबादी होणी चाहिए...
दिल्ली की असैम्बली के संग, लडूं स्वतन्त्र केस मैं
जात-पात की रगड़ा-झगड़ा मेट द्यूं क्लेश मैं
हो जात-आजाद देश मैं नरमादी होनी चाहिए...
समझो एक समान ‘दयाचंद’ हार और जीत भी
छोरां आली रागनी और छोरियां के गीत भी
हो तेरी बातचीत भी सत्यवादी होणी चाहिए...
