काम करै मजदूर खान में
खेत में करै किसान
जे छै आपनोॅ देश के शान
जै पर टिकलोॅ हिन्दुस्तान।
भारत के जनतंत्र पहरुआ
यही वर्ग पर टिकलोॅ छै
निम्न वर्ग सब होकरे ही
सद्भाव प्रेम में बिकलोॅ छै
सिर पर टोपी, नम्मा धोती
नेता के पहचान।
बड़का-बड़का मीलमालिक के
मील-मजरुआ हाथी छै
मिलीभगत छै दोन्हों में
औफिसर हुनकोॅ साथी छै
हाथी सें कमवावे लेली
बैठलोॅ छै पिलवान।
जिनगी भर जें खून सुखाय केॅ
मिट्टी-पत्थर तोड़ै छै
माँस-लहू चूसी केॅ होकरोॅ
हड्डी भर ही छोड़ै छै
घोॅर बनाय के सपना लेनें
त्यागी दै छै जान।
जै पर टिकलोॅ हिन्दुस्तान
जे छै आपनोॅ देश के शान।