टहलू मड़रोॅ के गाछी केॅ, सुरजी काटी लेलेॅ छै।
जोर-जबरदस्ती करलेॅ छै, सब केॅ ये दुख देलेॅ छै॥
ओकरे पंचेतो बैठलोॅ छै, यै गाछी के छाया में।
सुरजीं पंचोॅ केॅ भङ्ठैलेॅ छै पेॅसा के माया में॥
वै गाछी पर पंचें दै छै सुरजीं मड़रोॅ केॅ अधिकार।
ई परपंच सुनो केॅ टहलू ठोकै छेॅ आपनों कप्पार॥
कौनें कहलेॅ छै ‘पंचोॅ के मूहों पर परमेसर छै?
पंचें परपंचे करथैं छै, कहाँ न्याय रत्ती भर छै?
उलटे-टहलू मड़रोॅ केॅ जुर्बाना होलै तीन पचीस।
करजा लेॅ केॅ टहलू देलकै, आज कहाँ छोॅ हे जगदीस?
पचें तेॅ परपंच करै छै ओकरोॅ दुनियाँ छै रंगीन।
बाप-पूत छै पंच जहाँ, बरदा के दाम रुपैया तीन॥