असां जी ज़िंदगीअ जे
ज़रूरतुनि जो गुज़रु
हिक ई बाज़ार मां आहे;
उते
टिनि क़िस्मनि जा
दुकान आहिनि
सरकारी, नीम सरकारी, ख़ानगी
सरकारी दुकाननि जा
वट
बराबर आहिनि,
मगर
ताराज़ीअ में काणि आहे।
नीम-सरकारी हथनि जी
ताराज़ी ठीक आहे
मगर
वर खोटा आहिनि,
खानगी स्टोर
इन्हनि बिन्ही ऐबनि खां
आजा आहिनि,
लेकिन उते
मालु नक़ली आहे।
सरकारी दुकाननि में,
नज़र छिकीन्दड़ तख़्ते ते
लिखियलु आहि-
‘भली करे आया-
असीं तव्हां जा
शेवक आहियूं’
मगर
शेवकनि जे निगाहुनि मां
साफ़ ज़ाहिर आहि:
असां खे ग्राहकनि खां
नफ़त आहे।
नीम-सरकारी हटनि
भिति ते हिक
वेनती चंबुड़ाए छॾी आहे
त
असां जी शेवा मां
जे ख़ुश आहियो,
त
ॿियनि खे ॿुधायो
ऐं जे नाराज़,
त सिर्फ़ असां खे!
हुननि
सुहिणनि सन्हनि अखरनि में
ही भी
लिखी छॾियो आ:
ग्राहकु सदाईं बराबर आ,
मगर
उते जे मुलाज़िमनि जी
रविश जे परदे ते
साफ़
वॾनि अखरनि में
लिखियलु आहे,
‘ग्राहकु सदाईं ग़लत आ’।
ख़ानगी स्टोर वारा
उसूल जा पुख़्ता आहिनि।
दरवाजे़ वटि ई
बोर्डु हणी छॾियो अथाऊं
हिकु अघु, (छव ठंतहपंद च्समंेम)
मगर
सन्दनि धंधोड़ी मुरिक
ऐबदार ग्रामोफोनु
रिकार्ड वांगुरु वॼे थो
मालु पसन्द कयो,
अघ ते ठही पवन्दासीं
मालु पसन्द कयो, अघ ते ठही पवंदासीं
मालु पसन्द कयो, अघ ते ठही पवंदासीं।
हीअ हिक ई बाज़ार
असां जी मजबूरी आ
मगर
असां मोरचा कढी
नारा हणी
विढ़ी-झुड़ी
इहो हकु
हासिल कयो आहे
त
असां ताराज़ीअ जी
मार खाऊं
या
वटनि खां पाणु फटायूं?
या
नुकुली माल सां
खु़द खे फुरायूं
असीं कहिड़े बि दुकान जा
ग्राहक थियूं
असां इहा
मुकम्मल अख़्तियारी हासिल कई आहे।
(सोच जा पाछा, 1989)