वक़्त खे गुज़िरिएि वक़्तु थियो आहे
रात फ़ोतीअ जी विरासत जियां
रोशनियुनि में विरहाइजी वेई आहे,
ॿिनि रोशनियुनि जे हिक ऊंदाहे अन्तराल में
मां बीहिजी वियो आहियां।
रस्ता हिकु हिकु थी हलिया विया आहिनि
मुंहिंजो रस्तो
आखि़री बस ते सवार थी
वञी चुको आहे।
इमारतूं हलण लॻियूं आहिनि
रोशन कमरा
हेठि मथे
अची वञी रहिया आहिनि।
अचानक मुंहिंजे सामुहूं
किु पंज-स्टारी रेस्टारेंट
हलन्दे हलन्दे
रुकिजी वेई आहे
ॿाहिर खुलीअ फ़िज़ा में
हवा जो दमु घुटिजी रहियो आहे
मां साहु खणण लाइ
टपो ॾेई
रेस्टारेंट में अन्दर घिड़ियो आहियां।
हिक कुरसीअ
मूंखे पकिड़े वरितो आहे
ऐं पाण ते विहारे छॾियो आहे।
आवाज़! आवाज़!! आवाज़!!!
उल्लू, चिॿिरा, कांव
ॻिझूं, सिरिणियूं, बाज़
शींहं, बघड़, लूमड़
हर कुरसीअ ते हिकु आवाज़ु वेठो आहे,
वर्दीअ में कुझु आवाज़ बीठा आहिनि
‘येस सर, छा आणियां?’
‘हिकु चोथो पेग ज़हरु।’
‘देसी या विलायती?’
‘को फ़रकु आहे?’
‘देसी माल जी गारंटी कान्हे।’
‘विलायती आणि।’
हिक उल्लूअ जो आवाजु़
पंहिंजी कुरसीअ तां उॾामी
मुंहिंजे कुल्हे ते अची वेठो आहे
‘छा कन्दो आहीं?’
‘शाइरु आहियां।’
‘सो त ज़ाहिर आहे, पर कन्दो छा आहीं?’
कंहिं पुराणीअ याद जियां
मूंखे खिल अची वेई
ऐं मुंहिंजे आस-पास
आवाज़नि जी भीड़ जमा थी वेई आहे।
पेगु अची वियो आहे
कोई धमाको न थियो आहे
पोइ बि धमाके खां पोइ जो सन्नाटो
छांइजी वियो आहे।
मूं पंहिंजा चप लाहे
प्याले में विझी छॾिया आहिनि
पीअण जी आग
प्यास जे सागर खे
ढुकु ढुकु करे पी रही आहे
ज़िन्दगी मूंखे जी रही आहे
ऐं आवाज़नि जे अंबोह में
मुंहिंजो आवाजु़ बुडी रहियो आहे।