साइरनु / सीरू स्याह

काल्ह साइरनु वॻो हो
चौतरफ़ ‘ब्लैक आऊट’ बि ॾिठो पिए
‘ब्लैक हाऊट’ खे
शहरनि, ॻोठनि, बस्तियुनि जी
चंचल ज़िन्दगी
दर-दरियूं बन्द करे

बेवस बणिजी
चुप चाप वेठी हुई
चौदीवारुनि में
चौदीवारुनि वांगुरु!
मिलियुनि, कारख़ाननि जो
उभामन्दडु शोरु
समाइजी वियो हो
ढलाई-ख़ाननि जे
विसामियल बठियुनि में!

आस पास खां ईन्दड़
बमनि जे बौछार जा आवाज़
ॾारे रहिया हुआ
दरनि, दरियुनि, दीवारुनि खे!
लॻे थो मौतु
कंहिं अफ़ीमची लंगिड़े बुढे जियां
भिटिकी रहियो हो दर दर
घिटीअ घिटीअ में!
ज़िन्दगी चौदीवारुनि में बन्द हुई
चौतरफ़ ‘ब्लेक आऊट’
ॾिठो पिए ‘ब्लैक आऊट’ खे
काल्ह साइरनु वॻो हो।
साइरनु अजु बि वॼन्दो

अजु जो साइरनु
अनुशासन
दूर दृष्टी आहे।
अजु जो साइरनु
अटल विश्वासु,
कड़ी महिनत आहे
अजु जो साइरनु आहे
अमन जो आवाजु़
सुख शान्तीअ जी निशानी।
अजु जो साइरनु
मिलियुनि कारख़ाननि जो
उभामन्दडु़ शेर आहे
अजु जो साइरनु
गांवनि जी ख़ुशहाली
खेतनि जो रखवालो आहे।