इहो हंधु
हाओ
इहो हंधु आहि
ओलह तरफ
जिते
शाम जो
ॾींहुं
थकलु ऐं टुटलु
सफ़र जी पछाड़ीअ संदे दौर में
मटाए वॻो
ऐं
ढके
ख़ाकी
मेरांझड़ी
ओढणी
दूंहांटियल नज़ारनि
ऐं रंगनि मंझां
वञे
तेज़
तकिड़ो
थो विख पाईंदो
ख़बर नाहि
कंहिं नहर
या
बहर ॾे
थकावट भञण लाइ... आराम लाइ।
थी थोरनि ई पासनि वराइणु पुॼाणा
वठे खेसि निंड...
ॾिसे खू़ब थो ख़्वाब
रंगीन
अजीब
फ़लक ते मतल चंड तारनि जी मह्फ़िल
ज़मीन ते बि जॻमॻ
बतियूं
बिजलियूं
मिठियूं रोशनियूं
छिकींदड़ फ़िज़ा
मस्त कंदड़ हवा...
इएं
ओचितो आग जे गोले जे ताब ते
थो जाॻी पवे ॾींहुं
ऐं
महिटे अखियूं
इरादो करे
जोश जज़्बे विचां
कलहूणे सफ़र खे नएं-सिर लॻे।