कॾहिं
ॾींहं ओसीड़े जा
ख़तम थींदा?
कॾहिं
ख़्वाब रंगीन
साभिया थी ईंदा?
ॾीओ घर जो ॿरंदो
नओं नूर
जॻ खे नओं नूर ॾींदो?
संदमि लाल ईंदो
अची
गोद मुंहिंजी
सिकूनि सां भरींदो
चुमां चाह मां जिअं
चॻड़ि खूब ॾींदो
रुसे या रड़े
मां
गुॾियूं टोल आणे
गले सां लपेटे
नचाए
कुॾाए
एं पाॿोह ॾेई
मनाइण लइ हीला कंदियसि
लोली ॾींदियसि?
रिलीअ खे भिॼाए
रिढ़ी रेढ़ियूं पाए
कॾहिं
मुंहिंजो गुंचो
‘अमां’ मुख सां चवंदो?
पड़ाॾो
मिठी गूंज जो
कन में ईंदो?
मुनणु हुनजो ॾिसंदियसि
जणियो हुनजो ॾिसंदियसि
पढ़ण वेंदो स्कूल
अलिफ़ बे ॿुधंदियसि
खिली
खुश थी
नेरण मंझंद शाम ॾींदियसि
सुम्हण वेल
भाकुर में हुनखे भरींदियसि?
कंदो काठ घोड़े जी
जॾहीं सवारी
खणी लकड़ी
जेॾनि सां तलवारबाज़ी
हलाईंदो बंदूक
छोड़ींदो तीर
भॼाईंदो दुश्मन
ऐं मारींदो मीर
त ॿलिहार थींदियसि
मथिसि घोरी वेंदियसि?
कंदो इम्तिहान पास
ईंदियसि जवानी
कमाईंदो राजाई
आणींदो राणी
मुबारक
मुबारक
मूंखे राॼु ॾींदो
खुशीअ खां
छनो मुंहिंजो
थी सर्ग पवंदो?
वधी
थींदो वेंदो
हू
वणु मायःदार
सदा साओ
भरपूर
ऐं साएदार...
मां ॿुढिड़ी
चिॿी
कद कुबी
ऐं भुॾी
नज़र घटिजी वेंदी
ऐं ॿोड़ाणि वठंदी
न वेसरि खां
कुझ
याद पवंदो मूंखे...
उन्हीअ वक्त...
उन्हीअ वक्त
जॾहिं मां पराधीन थींदियसि
सवें मुश्किलुनि में गिरफ़्तार थींदियसि
तॾहिं
मुंहिंजो दिलबंद
अखिड़ियुनि जो तारो
कंदो याद माज़ी?
ऐं ॾींदो सहारो?
कि आजिज़ ॾिसी
अखि खणी कीन पुछंदो?
कि पंहिंजनि ई ॿारनि खां वांदो न हूंदो?
इएं
प्यार अंदेशे जी कशमकश
छिके
दिल जे दामन खे
फाड़े विझे थी
वञां थी
विसी थी
ऐं घॿिराइजी...
हयातीअ जा दम
खै़र सुख साणु गुज़रनि
धणी शल सदा
पंहिंजी हलंदीअ हलाए।