थल्ह:
चाहीं थो तूं दुनिया में अचे इंकलाब गर,
ऐ जवान इंकलाब जो नारो बंलंद करि।
शइर:
चौतरफ़ आहे जंग जो ब्यूगल वॼी रहियो,
हर शेर दिल सिपाही मदद लाइ भॼी रहियो,
हर हिक कदम ना पोइते, अॻिते, खॼी रहियो,
आज़ादी आरजू में रची ऐं रॼी रहियो।
माता जे मुर्कंदे हली क़दमनि में सीसु धरि,
ऐ जवान इंकलाब जो नारो बुलंद करि।
शइर:
रस्तो अणांगो, राह ॾुखेरी त वाह आ,
हर सू अंधारी रात, सणाई न राह आ,
हर्गिज़ न हटु, जे तोफ तफंगनि सां काह आ,
तुंहिंजे लइ अहिंसा जो क़िलो ई पनाह आ।
थींदो न अहिंसा जो कॾहिं तीरु बेअसर,
ऐ जवान इंकलाब जो नारो बुलंद करि।
शइर:
छो थो डिॼीं जवान जे पाणी अथाह आ,
गजगोड़ गाज शोर में बिल्कुल दरियाह आ,
करि खौफुन तूं, तो सां त सुहिणो मलाहु आ,
भारत जो मोर गांधी त बेताज शाह आ।
सख्तियुनि जी आग शेर तूं ॿरंदी ॾिसी न ॾरु
ऐ जवान! इंकलाब जो नारो बुलंद करि।
शइर:
तोते फ़तह जो जवान, सॼो ई मदारु आ,
भारत जा शेर तोते रिहाईअ जो बारु आ,
लायकु पुत्रु ई माता जे नेणनि जो ठारु आ,
मरंदें तॾहिं बि तो लइ खुल्यलु सर्ॻ द्वारु आ।
परवाह नाहे, आहि ‘‘दुखायल’’ जे को खतर,
ऐ जवान! इंकलाब जो नारो बलंद करि।