आवत जब बरसात झरी निस दिन की लागत।
तब तो आठो पहर अधिक तर ढोलहिं बाजत॥296॥
गावत करखा आल्हा के योधा अलबेले।
देत वीरता बारिधि की लहरैं जनु रेले॥297॥
बजत ढोल घन गर्जनसम कीने रव भारी।
चटकत गायक मानहुँ बिज्जु पतन चिक्कारी॥298॥
जानि परत जनु ऊदल आप आय इत डपटत।
कै करीन माला पैं कुपित केहरी झपटत॥299॥
जहँ बैठे नर ऐंठे मूछ, रोस भरि घूरैं।
तनहिं तनेनै अंगड़ि अँगरखान के बंद तूरैं॥300॥
बातनि, उठनि, खसकि बैठनि मैं होत लराई.
मचै जबै घमसान बन्द तब होत गवाई॥301॥
होय बन्द जब एक ओर तब दूजी ओरन।
चटकत ढोल सुनाय सहित करखा के सोरन॥302॥