भारत की संस्कृति के लिए... भाषा की उन्नति के लिए... साहित्य के प्रसार के लिए
गीतावली सुन्दरकाण्ड पद 41 से 51 तक/पृष्ठ 3
Kavita Kosh से
Dr. ashok shukla (चर्चा | योगदान) द्वारा परिवर्तित 18:57, 9 जून 2011 का अवतरण (नया पृष्ठ: {{KKGlobal}} {{KKRachna |रचनाकार=तुलसीदास |संग्रह= गीतावली/ तुलसीदास }} {{KKCatKavita}} [[Category…)
(43)
सुजस सुनि श्रवन हौं नाथ! आयो सरन |
उपल-केवट-गीध-सबरी-संसृति-समन,
सोक-श्रम-सीव सुग्रीव आरतिहरन ||
राम राजीव-लोचन बिमोचन बिपति,
स्याम नव-तामरस-दाम बारिद-बरन |
लसत जटाजूट सिर, चारु मुनिचीर कटि,
धीर रघुबीर तूनीर-सर-धनु-धरन ||
जातुधानेस-भ्राता बिभीषन नाम
बन्धु-अपमान गुरु ग्लानि चाहत गरन |
पतितपावन! प्रनतपाल! करुनासिन्धु!
राखिए मोहि सौमित्रि-सेवित-चरन ||
दीनता-प्रीति-सङ्कलित मृदुबचन सुनि
पुलकि तन प्रेम, जल नयन लागे भरन |
बोलि, "लङ्केस कहि अंक भरि भेण्टि प्रभु,
तिलक दियो दीन-दुख-दोष दारिद-दरन ||
रातिचर-जाति, आराति सब भाँति गत
कियो सो कल्यान-भाजन सुमङ्गलकरन |
दास तुलसी सदयहृदय रघुबंसमनि
"पाहि कहे काहि कीन्हों न तारन-तरन ?||
