भारत की संस्कृति के लिए... भाषा की उन्नति के लिए... साहित्य के प्रसार के लिए
भूषन-बसन सजाय सबिधि / हनुमानप्रसाद पोद्दार
Kavita Kosh से
Sharda suman (चर्चा | योगदान) द्वारा परिवर्तित 18:20, 6 जनवरी 2014 का अवतरण ('{{KKGlobal}} {{KKRachna |रचनाकार=हनुमानप्रसाद पोद्दार |अनुवादक= |स...' के साथ नया पन्ना बनाया)
भूषन-बसन सजाय सबिधि मैया मुरली कर दीनी।
कमलनैन ने कर्यौ कलेऊ, चलिबै की मन कीनी॥
मैया कह्यौ-’लाल मेरे तुम बहुत दूर जिन जइयौ।
साँढ-साँप-बीछिनि तें लाला ! दूर डरत ही रहियौ’॥
सूधे-से हामी भर, तुरतहि आँगन-बाहर भागे।
कारौ नाग देखि, तहँ, तातें करन अचगरी लागे॥
पाछे-पाछे आय रही ही मैया नेह-भरानी।
विषधर भुजँग निकट लाला कौं देखत ही डरपानी॥
दौरि हटकि धीरे तें नेह-भरे मन लगी डरावन।
कोमल अँगुरिन पकरि कान दहिनौ लागी धमकावन॥
अचरज भरे डरे मन लाला अपराधी-से ठाढ़े।
मैया च्यौं निरदोष मोय डरपावति, सोचत गाढ़े॥
लोकपाल काँपत जा के डर, अखिल भुवन के स्वामी।
डरपत लीला करत स्वयं वे भक्त-प्रेम-अनुगामी॥
वत्सलता परिपूरित मैया-हिय कैसो सुचि पावन।
देखत फन उठाय फनि निज लीला सुललित मन-भावन॥
