कहना से ऊनई कारी बदरिया / बुन्देली

कहना से ऊनई कारी बदरिया
कहना बरस गये मेघ मोरे लाल।
ससुरे से उनई अरे कारी बदरिया,
मयके बरस गये मेह मोरे लाल।
कौना ने बो दई लटक कंकुनिया,
कौना ने सठिया धान मोरे लाल।
ससुरा ने बो दई लटक कंकुनिया
बाबुल ने सठिया धान मोरे लाल।
कौना के नींदे घर की निदइया,
कौना के लगे हैं मजूर मोरे लाल।
ससुरा के नींदे घर के निंदइया,
बीरना के लगे हैं मजूर मोरे लाल।
कौना के काटे बे घर के कटइया,
कौना के काटे मजूरे मोरे लाल।
ससुरा के काटे घर के कटइया,
बीरना के काटे मजूर मोरे लाल। कहना...