बुन्देली लोकगीत ♦ रचनाकार: अज्ञात
इन रघुनंदन धनुष उठाये।
धनुष उठाये बारी सिया को ब्याय लाये।
माथे सेहरो बाँधों राजा बनरे सो कलियन बीच बारी सिया ब्याय लाये।
सो इन...
चंदन खौर काढ़ौ बारे बनरे सो टिपकिन बीच
वारी सिया ब्याय लाये सो इन...
कानन कुण्डल पहनों बारे बनरे सो मोतिन बिच
बारी सिया कौ ब्याय लाये इन रघुनन्दन...
मुख भर बिरिया चावौ बारे बनरे सो लाली बिच
वारी सिया ब्याय लाये इन रघुनंदन...
हाथन कंकन बाँधो राजा बनरे सो गजरन बिच
वारी सिया ब्याय लाये इन...
चरनन माहुर लगाऔ बारे बनरे सो लाली बिच
वारी सिया ब्याय लाये इन...
इन रघुनंदन धनुष उठाये धनुष उठाये
वारी सिया कौं ब्याय लाये।