चउका चढ़ि बइठलन कवन बाबू / मगही

चउका<ref>अल्पना से पूरित बेदी</ref> चढ़ि बइठलन कवन बाबू।
जाँघ ले ले धिया बइठाइ हे॥1॥
ए राम, असरे पसरे<ref>अगल-बगल</ref> चुनरी भींजल ना।
रउरा परभुजी बेनियाँ<ref>हवा करने के लिए छोटा पंखा, व्यजन</ref> डोलावऽ ना॥2॥
कइसे बेनियाँ डोलाऊँ हे सुगइ।
ताकत होइहें<ref>देखते होंगे</ref> बाबूजी तोहार हे॥3॥
चलु चलु सुगइ हमर देसवा।
उहँई<ref>वहीं</ref> देबो बेनियाँ डोलाइ ना॥4॥
चउका चढ़ि बइठलन कवन चच्चा।
जाँघ ले ले धिया बइठाइ हे॥5॥
ए राम, असरे पसरे चुनरी भींजल ना।
रउरा परभुजी बेनियाँ डोलावऽ ना॥6॥
कइसे बेनियाँ डोलाऊँ हे सुगइ।
ताकत होइहें चच्चा तोहार हे॥7॥
चलु चलु सुगइ हमर देसवा।
उहईं देबो बेनियाँ डोलाइ ना॥8॥