भारत की संस्कृति के लिए... भाषा की उन्नति के लिए... साहित्य के प्रसार के लिए
बै अर म्हैं / संजय पुरोहित
Kavita Kosh से
Neeraj Daiya (चर्चा | योगदान) द्वारा परिवर्तित 16:09, 28 नवम्बर 2015 का अवतरण ('{{KKGlobal}} {{KKRachna |रचनाकार=संजय पुरोहित |संग्रह= }} {{KKCatKavita}}<poem>ब...' के साथ नया पृष्ठ बनाया)
बै जिका काल
खड़्या हा
म्हारै कड़ूम्बै आगै
म्हारी रोटी
अर मजूरी री
लड़त खातर
बै जिका
काल लगा रैया हा
नारा बाका फाळ‘र
म्हांरै भूखै पेट री
दे‘र दुहाई
आज म्हानै
पिछाण‘न सूं ही
निजरां फेरै
आज म्हारी
लड़त खड़ी है
सागी जाग्यां
पण बै अबै
म्हारै बुकियां सूं
ले‘र ताकत
थरपीज्ग्या है
आभै थिर
कुर्सियां माथै
अबै उण खातर
म्हैं हुयग्या
कीड़ी-माछर
म्हैं पूठा आयग्या
म्हारै टापरै
म्हैं हर म्हांरी
लड़त
रोटी री अर मजूरी री
रैयी
सागी री सागी
