भारत की संस्कृति के लिए... भाषा की उन्नति के लिए... साहित्य के प्रसार के लिए
मोॅन नैं लागै छै / कस्तूरी झा ‘कोकिल’
Kavita Kosh से
Lalit Kumar (चर्चा | योगदान) द्वारा परिवर्तित 13:56, 29 फ़रवरी 2016 का अवतरण ('{{KKGlobal}} {{KKRachna |रचनाकार=कस्तूरी झा 'कोकिल' |अनुवादक= |संग्र...' के साथ नया पृष्ठ बनाया)
कैहिया करभौ गौना भौजी? होली आबै छै।
ढोलक झाल मंजीरा सुनिकेॅ मोॅन नैं लागै छै।
राधा बनिकेॅ नाचबै हम्हूँ,
बन्थिन कृष्ण कन्हैया।
सखी सहेली मिलकेॅ नाचबै,
नाचतै खूब ढोलकिया।
तोहर वाला पलंग देखकेॅ मोॅन ललचाबै छै।
कैहिया करभौ गौना भौजी? होली आबै छै।
ढोलक झाल मंजीरा सुनिकेॅ मोॅन नैं लागै छै।
टुकुर-टुकुर ताकै छै ताराँ
चान निहारै छै।
कुहू-कुहू बोली केॅ कोयली,
आग लगाबै छै।
केनाँक बनबै चिड़िया बोलेॅ पंख नैं लागै छै?
कैहिया करभौ गौना भौजी? होली आबै छै।
ढोलक झाल मंजीरा सुनिकेॅ मोॅन नैं लागै छै।
हमरा पास मोबाइल नैं छै
केनाँक करियै बतिया?
काँटा नाँकी दिन लागै छै,
सौतिन नाँकी रतिया।
कली फूल पर भौंरा गुन-गुन मोॅन उमगाबै छै।
कैहिया करभौ गौना भौजी? होली आबै छै।
ढोलक झाल मंजीरा सुनिकेॅ मोॅन नैं लागै छै।
-मुक्त कथन-वर्ष 31, अंक 29, 11 मार्च, 2006
