भारत की संस्कृति के लिए... भाषा की उन्नति के लिए... साहित्य के प्रसार के लिए
हर क्षण हेने ही लागै छै / चन्द्रप्रकाश जगप्रिय
Kavita Kosh से
Lalit Kumar (चर्चा | योगदान) द्वारा परिवर्तित 00:59, 8 जून 2016 का अवतरण ('{{KKGlobal}} {{KKRachna |रचनाकार=चन्द्रप्रकाश जगप्रिय |अनुवादक= |स...' के साथ नया पृष्ठ बनाया)
हर क्षण हेने ही लागै छै,
जोत तोरोॅ मन में जागै छै।
एक लहर जों सुख के आवै
मन केॅ दूर भँसैलेॅ जाबै,
कोॅन जनम के विसरी गेलोॅ
गीत-साथ में गेलेॅ जावै;
कभियो गोतै छै यादोॅ में
फेनू तुरत उठैलेॅ जावै,
कोय लहर जों पकड़ै छी तेॅ
दूर-दूर तांय ऊ भागै छै।
की सुख हमरोॅ यही लहर रं
अमृत-जल में धुलै जहर रं,
की हमरा लेॅ प्रेम-प्रीत सब
जेठोॅ के दिन, बीच पहर रं;
ई तपलोॅ धरती पर ऐथैं
सूखी जाय छै नदी-नहर रं,
ओकरै आय धरै लेॅ चाहौं
जे सुख सुख केॅ ही त्यागै छै।
